عشرة اسباب لكى تدخل كلية الصيدلة

ليه تدخل صيدلة

اولا كلية الصيدلة كغيرها من كليات القمة تعطيك برستيج لايتوفر فى غيرها من الكليات فتصبح الدكتور راح الدكتور جه اما لاسمح الله لو كنت كلية تانية فتتحول بقدرة قادر الى الزفت راح الزفت جه الزفت لسه مخمود بسلامته

اما لو كنت من منطقة شعبية فانا اضمن لك ان تصبح رمز الطب فى المنطقة فلن يخلو باب بيتك ابدا من احدى الجارات التى تسالك عن افضل دواء للسكر او الضغط او (مفاصلى بتوجعنى يابنى وحاسة ان جسمى مكسر) او حتى عن احسن مرهم لتسلخات الحفاضات وده بالرغم انك ممكن تكون فى اعدادى لسه ومختش غير نبات وحيوان ولسه مدخلتش على البنى ادمين يامعلم

دخولك الصيدلة يجعلك مفخرة الاسرة فلن يخلو حديث والدك ابدا من كلمة (وابنى الدكتور فلان عمل كذا او ذهب الى الحتة الفلانية) او حتى لما يقدمك لحد متعرفوش اقدملك ابنى الدكتور فلان كلية صيدلة يتحدث عنك كانك عميد الكلية مش لسه مجرد طالب ويمكن شايل صناعية كماناما اذا كنت من النوع اللذيذ اللى بيقلب الفلوس على السيد الوالد فهذه فرصتك فلا تتردد فتستطيع ان تسحب كل شوية فلوس على حس الكتب وادوات المعمل والكورسات اه مش كلية عملية بقى وضحيت عشان تحقق حلم السيد الوالد ان يكون له ابن دكتور يبقى يدفع بقى ياعم والا والله احول بكره اداب

دخول الصيدلة يحميك من كل تلك الاتاوات اللى يفرضها عليك عمال وفنييى المعامل فى الكليات الاخرى وخصوصا طب وعلوم وكل سنة وانت طيب يادكتور والتى لاتعرف لها اى مناسبة ربما هو عيد ميلاد العامل نفسه او حتى النظرات الصامتة من طراز تعاطفك لوحده مش كفاية ولازم تدفع نصف جنيه عشان تاخد كراسة العملى اما لو مكنش معاك فكة فسيب الجنيه لاخوك بنية صافية

دخول الصيدلة يمنحك الحرية اللى تمنتها فيمكنك ان تتاخر لاى ساعة من الليل بحجة ان عندك سكاشن سوارييه او كان عندك كورس وعندما يكلمك والدك على الموبايل فتخبره انك مش لاقى مواصلات عشان السواقين عاملين اضراب عشان ارتفاع اسعار البنزين وانك زعلان جدا عشان التاخير بينما انت زعلان عشان زيدان اتصاب وانت بتلعب بلاى استيشن مع وائل عند احمد عادل فى المحل

دخولك الصيدلة يجعلك عريس لقطة لاى واحدة على اساس انك صيدلى بقى وبتلعب بالفلوس لعب (ميعرفوش اللى فيها)خصوصا لو زوجتك مش صيدلانية يعنى اما لو اكتشفت الحقيقة بعد الجواز وانك يامولاى كما خلقتنى فبتكون الفاس وقعت فى الراس وخلاص ادبست يا معلم وسلملى على الشفافية

دخولك الصيدلة وعدم دخول الطب يحميك من كل التبعات التى تاتى بعد ذلك من الاصابة بالربو نتيجة استنشاق الفورمالين فى المشرحة الى تنطيط واحد بتاع دبلوم عليك لانك مدير الوحدة الصحية(ومانتش لابس البالطو ليه يادكطور) الى تحكم الدكتور الللى انت بتعمل رسالتك تحت اشرافه فيك وطلبه منك اشياء غريب (وعايز منك دراسة للدورة الدموية لفار امه ميتة ومراته اتطلقت منه واتجوزت تانى)

دخولك الصيدلة يحميك من نصب الاطباء معدومى الضمير(على اساس ان مبروم على مبروم ميلفش)فتذهب الى هذا الطبيب تشكو من الام فى الظهر فيكتب لك على مسكنات فالاضافة الى نوعين او ثلاثة من الفيتامينات (وده على اساس ايه يامعلم شايفنى بطوح قدامك من التعب) وهكذا تذهب الى الصيدلية فتحضر المفيد فقط وتلقى بقية الروشتة فى اقرب سلة مهملات او ان يكتب لك على شوية تحاليل ملهاش لازمة تعملها فى معمل المدام(ياباشا انا عندى الام فى الظهر اعمل تحليل دهون ليه) وهكذا تعرف ان الدكتور ده نصاب ومترحلوش تانى

دخولك الصيدلة يتيح لك فتح صيدلية وبالتالى تحصل على اى دواء تحتاجه دون ان ينظر لك احد كده ولا كده كما يتيح لك ايضا الحصول على تلك الادوية التى تسهل لك امورك فى جميع المصالح والهيئات الحكومية حتى لو كانت المطارواخيرا مزاجك ياخى تدخل صيدلة حد ليه حاجة عندك